盛智文捐錢最少5議員有份

【明報專訊】新民黨顧問、「蘭桂坊之父」盛智文係真正嘅「政壇萬能key」？睇番立法會議員利益申報，有透露選舉捐贈詳情嘅議員中，盛智文捐咗畀起碼5人，公民黨湯家驊（Ronny）就笑言自己收得盛智文最少錢，但資料顯示，Ronny都收咗4萬蚊，民主黨劉慧卿、單仲偕收咗5萬蚊，涂謹申就有3.5萬蚊，自由黨張宇人（Tommy）只有1萬蚊，所以Ronny「低處未算低」呀！

涂謹申收捐款少過黃碧雲

立法會議員最遲噚日要向秘書處遞交利益申報資料，佢哋都算跟足規則，所有議員已經上載資料。Emily發現，民主黨超級區議會涂謹申收到嘅捐款，仲少過直選黨友黃碧雲，阿涂話家仲搵緊捐款，表明「粒粒皆辛苦」。


阿涂估計今次全港選舉使費走唔甩300幾萬，但只搵到59.6萬，佢解釋如果係現任議員，個黨會畀少啲資助，家真係「多多益善、少少無拘」。黃碧雲就收到近65萬蚊，其中搞myradio嘅畢浩明捐贈33萬，泌尿科醫生、黨友吳崇文就捐6萬，其他就係高教界朋友同事。


公民黨Ronny就收到7個人同公司共12.6萬捐款，佢同Emily講，發咗五六十封信畀商界人士籌款，但捐錢嘅只有香港英商會執行董事夏偉邦、前客戶同朋友。佢成個選舉使咗200幾萬，其餘睇嚟都要自己埋單。


自由黨田北俊出名富貴，田大少收咗74.8萬，原來有成70萬蚊係自由黨畀，另外4萬蚊就係家族生意萬泰製衣，唔怪得可以賣咁多廣告啦。