工黨4子穿I LOVE HK Tee宣誓

【明報專訊】立法會唞暑3個月，經過選舉後，一眾新舊議員噚日返到立法會開首次會議，民建聯開會前13個議員嚟張大合照，男嘅打民建聯呔，女議員就戴絲巾，一向鍾意著鮮色衫嘅副主席蔣麗芸，上午一身黑色現身，但到下晝開會就著番件桃紅色褸，同穿藍色套裝嘅黨友葛珮帆（EQ）好似孖公仔咁。


蔣麗芸一日兩個look

有行家見到噚日朝早有人跟住EQ，幫佢整理頭髮等，令大家好奇唔通佢有御用「政治化妝師」？EQ就話只係民建聯噚日請人幫佢哋影相，職員順手幫佢撥一撥頭髮，仲笑言係咪因為佢個妝化得好靚，所以大家先咁問。


至於工黨亦有「制服」，噚日4個議員都著住印有「I LOVE HK」嘅T恤，雖然學民思潮同學仔國慶日著住呢件衫去睇升旗禮就被帶走，但噚日工黨議員就可以入議事廳。唔單止著Tee抗議，李卓人佢哋宣誓時，仲有戴住「打倒生果金資產審查」嘅拳頭套，寓意要代人民同政府打拳賽。


長毛氫氣球被沒收

社民連梁國雄噚日又諗住入議事堂放氫氣球，但未開會就被保安沒收，長毛話保安希望佢唔好令大家難做，因為佢之前放波，已經搞到秘書處好難清理，長毛一向對保安唔錯，亦無堅持帶入去喇。


一眾議員宣誓，唔少議員嘅另一半都有坐喺公眾席上，見證議員宣誓，好似新民黨田北辰太太都有到場，而謝偉俊嘅另一半白韻琹，更加著住件卡通miffy褸出現，好搶眼。剛卸任立法會秘書長嘅吳文華，亦有以市民身分嚟睇議員宣誓。