57歲大嚿抱孫

【明報專訊】立法會噚日開鑼，一眾議員宣誓就任，平時口若懸河嘅人民力量陳偉業（大嚿），噚日宣誓時老貓燒鬚，食晒螺絲，唔少人都笑佢做乜咁失威，原來大嚿前日先落機返港，狀態麻麻，佢之前喺加拿大留咗3個星期，因為佢大女喺嗰邊生咗個千金。57歲嘅大嚿首次做外公，當然要陪吓佢哋啦。


飛加拿大探望

噚日內委會、財委會選主席，大嚿竟然喺議事堂內用電腦開facebook，睇真啲原來佢係睇緊同外孫女嘅合照，佢同Emily講外孫女出世時係巨B，重8磅15安士，大嚿相信BB同佢好有緣，原本個女預產期係9月6日，但最終等埋外公選立法會，大嚿14號飛過去，外孫女15號就出世喇。


大嚿講起外孫女時好慈祥，但佢見到財委會辯論主席人選時，就忍唔住向建制派開火，大聲鬧民建聯陳鑑林，睇嚟孫女都唔可以令佢溫柔啲。