新聞類別
港聞
詳情#
【明報專訊】特首梁振英上月中公布環境局、運輸及房屋局同埋保安局3個副局長人選，其餘副局長仲未有下文。早排盛傳係勞工及福利局副局長熱門人選、社聯業務總監嘅蔡海偉，近排無晒聲氣，噚日Emily喺社聯記者會見到蔡海偉同埋社聯行政總裁方敏生出嚟講貧窮問題，就八卦咁問起蔡出任副局嘅可能，方敏生聽到後笑笑口無回應，反而蔡海偉諗咗一陣話﹕「除非坐喺我隔籬嘅方敏生話炒我啦，否則我唔會離開社聯㗎！」唔通佢暗示已經放棄加入政府嘅念頭？
Emily記得，當初同佢爭勞福局副局長一職嘅，仲有工聯會鄺志堅同埋前梁振英競選辦副主任何永謙，競爭一直好激烈，最尾仲演變成蔡海偉同鄺志堅之爭，但曾經有傳話勞福局長張建宗希望兩邊都唔得失，話可以唔需要副局長呢個職位喎，而蔡出任副局嘅行情亦滑落。
（楊德銘攝）
回應 (0)
