純官為窮孩 疏爽捐1200萬

【明報專訊】新世界發展主席鄭家純（純官）接受特首梁振英委任做扶貧委員會籌備小組成員後，捐錢都好疏爽。由社區組織協會管理同營運嘅「社區新世界」社區中心噚日正式啟用。中心位於深水福華街208A號1樓，主要提供兒童託管、功課輔導等服務。純官透過周大福慈善基金捐款1200萬元，資助開設成本同頭5年營運。


畀舒適環境小朋友溫書

純官噚日出席中心開幕禮時話，半年前同社區組織協會主任何喜華一齊去深水埗探訪劏房戶，見到小朋友居住同學習環境好惡劣，決定捐款開辦呢間社區中心，希望提供一個舒適嘅環境畀小朋友溫書，亦想做到牽頭作用，令多啲商界朋友參與社區扶貧工作。


何喜華大讚純官善心滿瀉，話純官喺探訪當日行足10層樓，大汗疊細汗毫無怨言，佢仲「爆料」，話純官喺扶貧委員會籌備小組內至少七八次叫政府增撥資源扶貧，非常有心。


另外，Emily都好關心純官爸爸鄭裕彤嘅病情，但純官噚日就唔願多講。