梁君彥石禮謙好「開放」

【明報專訊】新一屆議員就任，立法會嘅網站上亦有70個議員嘅通訊錄，Emily睇過，發現除咗社民連梁國雄，原來都有唔少議員好「開放」，將自己嘅手機號碼公開，而且唔少仲係建制派議員，好似內委會主席梁君彥、地產及建造界議員石禮謙等，只要大家上立法會網站睇吓，都可以見到佢哋嘅聯絡方法。


吳亮星梁繼昌fax號碼都無

不過，始終有議員可能認為手機號碼係私隱，只提供辦事處電話同自己嘅電郵地址，市民要搵佢哋都比較轉折。有少數議員喺通訊欄上連辦公室電話都無，例如金融界吳亮星、會計界梁繼昌，無論手機、辦公室電話甚至fax號碼都無提供，市民要搵呢啲功能組別議員似乎更難。


何俊仁「資料容後提供」

唔知係辦公室定係立法會秘書處未準備好，3個姓郭嘅議員郭家麒、郭偉強同郭榮鏗，以及民主黨何俊仁，連辦公室地址都無，只係有「資料容後提供」6個字。3個姓郭議員都係新丁或重返議會，但何俊仁呢啲做咗多年嘅議員都完全無資料提供，就有啲奇怪喇。