立會新人多 議員頻搞錯

【明報專訊】立法會噚日開會選出各委員會正副主席，不過，由於新議員太多，噚日議事堂鬧出唔少笑話。好似民主黨劉慧卿，噚日喺選公務員及資助機構員工事務委員會時，認錯咗商界（二）議員廖長江係勞工界嘅潘兆平。新民黨主席葉劉淑儀亦將勞工界另外兩名議員鄧家彪同郭偉強撈亂。民主黨涂謹申就話，覺得文化界馬逢國同工程界盧偉國好似樣，好難認。


卿姐撈亂廖長江潘兆平

不過，新議員似樣，都唔可以話係天生嘅，但係自由黨嘅田北俊同新民黨嘅田北辰，噚日開發展事務委員會嗰陣坐埋一堆，即使係坐喺主席位咁遠嘅劉皇發，都無叫錯兩位田少姓名，證明佢哋人氣完全無問題。


反而發叔就同民建聯陳恒鑌討論咗好耐，乜嘢係「每個月最後一個星期二」。話說發叔想每個月第4個星期二開會，但陳恒鑌就因為「最後一個」唔一定係「第4個」嘅問題，同發叔討論咗15分鐘，發叔先至一錘定音，決定每月第4個周二開會，講明唔再改，叫大家遷就，連人民力量陳偉業都大叫「主席英明」。