天文台請人 專門報天氣

【明報專訊】最近無綫電視《天氣報告》引入一套新嘅天氣預報系統，採用立體圖像布景，用嚟講解颱風移動路徑及風向等，特別生動。天文台就話，用動畫嚟報天氣，好適合市民觀賞，但為咗做到更精確，天文台計劃採購一套動畫軟件預報天氣，明年更會聘請一班口齒伶俐嘅科學主任，專責幕前預報天氣工作，以往輪流粉墨登場嘅科學主任，終於唔使捱義氣，可以專心工作嘞。


明年推長者圖像網頁

天文台網頁一向係所有政府網頁之中，點擊率最高嘅部門網頁，今年頭三季，點擊率破晒紀錄，達204億次，手機app瀏覽次數都有54億次。為改善天文台網頁太多資訊嘅缺點，明年會推出「我的天文台」，用戶可以根據個人喜好，挑選天文台首頁所顯示嘅資訊，唔使睇到眼花。另外，天文台最快下月改革長者使用網頁，由家只有多條連結，變成圖像，令長者更容易使用。