趙紫陽兒媳重返美林

【明報專訊】近排魚缸稍有起色，但小琴同啲金融界朋友傾開偈，佢哋都係吐苦水多，始終中環吹緊裁員風，大家保住個飯碗都已經心滿意足。不過總有才俊係「逆市奇葩」，講緊嘅係法巴大中華區企業融資部前主席任克英，亦即係中國前總理趙紫陽嘅兒媳，佢啱啱獲委任為美銀美林中國區行政總裁暨主席，兼且成為美銀美林亞太區執行委員會委員。


任克英2007至2009年期間係美林中國投資銀行業務主席，之後過檔法巴。喺加入美林前，任克英任職花旗，處理過嘅大刁有中國人壽（2628）喺美國上市，但其後美國證監會收到舉報，指中壽喺美國上市期間有不正當行為，任克英因而停職，但美國證監會事後冇展開過正式調查。兜兜轉轉，任克英又返番美林，相信美林希望借力任克英喺大陸嘅人脈，做多啲大刁。


中銀朱燕來夫婦出席慈善籌款

其實高幹子弟喺投行可以話係遍地開花，好似另一位中國前總理朱鎔基，佢個囝朱雲來係中金CEO，佢個女朱燕來就係中銀香港（2388）助理總裁，上周仲難得地同佢老公梁青（中國五金礦產進出口總公司董事）現身健康快車15周年活動