中銀副總裁「假鈔」考新丁

【明報專訊】唔止揸車要考牌，連做銀行都要考牌！噚日中銀香港（2388）副總裁楊志威（Jason）親自走落分行，仲出埋啲刁鑽問題，考起一班後生teller（銀行櫃枱出納員）。佢埋櫃枱存入人民幣嘅時候，問個teller「如果我呢啲係假鈔，點算？」又話要收起一張銀紙，睇吓teller會唔會認真數銀紙云云。好彩班teller都唔係省油的燈，仲話如果Jason真係出蠱惑，都會畀數銀紙機揭穿！


IVE學習中心 模擬銀行環境

其實貴為副總裁嘅Jason又邊使紆尊降貴，落分行搞存款吖。呢間其實唔係普通分行，係位於沙田IVE（專業教育學院）嘅金融服務學習中心，畀同學仔實習吓銀行工作嘅環境。當主持叫Jason為同學服務表現畀分時，這位銀行大員畀咗99分，這些學員應該深受鼓舞啦。