張華峯估詹培忠激光美容

【明報專訊】DR公司美容服務搞出人命，聽到都驚，立法會金融服務界議員張華峯爆料，話聽聞上手議員詹培忠，去咗哈薩克做一啲類似幹細胞方面嘅美容，佢最近見對方皮膚都滑埋，估計早前亦有做激光去走面上嘅痣，佢話老詹應該去咗大約一星期，或者對方唔止美容，連相關業務都有興趣投資咁話。Emily估唔到男士都會有咁大興趣美容，但張華峯笑言其實自己都有做激光去走臉上嘅老人痣。


立法會選舉，張華峯僅以6票之差贏咗「梁粉」李君豪，相信對方都覺得好唔抵，加上選舉時傳出又話中聯辦撐邊個、幫某人拉票等消息，搞到佢哋關係都唔係太好。張華峯噚日就慨嘆，選舉後第二日已經打畀李君豪約食飯，可惜對方一直話好忙，呢餐飯至今都仲未食到。


請3寫手1助理 要倒貼

作為新議員，張華峯都係喺摸索階段，佢話已經請咗3個寫手，負責幫佢寫經濟、民生、政治嘅發言稿同文章，嚟緊仲要請多一個助理，又透露單係請助理，份助理薪酬津貼已經唔夠用，自己都要倒貼。