工黨「熊貓眼」撐標準工時

【明報專訊】立法會愈來愈似話劇舞台，噚日開會，除咗特首梁振英出席發言外，議會亦有討論要求教育局長吳克儉下台，又討論標準工時等，唔少議員都做好準備扮鬼扮馬。好似工黨李卓人同張超雄，就化晒熊貓眼妝出入立法會，諷刺無標準工時就會搞到打工仔做到有一對熊貓眼；至於人民力量就準備咗標語牌，寫住梁振英、吳克儉同發展局長陳茂波滾蛋。


林健鋒張華峯齊打動物呔

經濟民生聯盟幾名男士，包括主席梁君彥同兩個副主席林健鋒同張華峯雖然無夾過，但就好有默契咁齊齊打動物呔現身，特別係張華峯龐大嘅身形，戴咗一條充滿肥豬嘅呔，十分可愛，佢話豬肥嘟嘟好得意，又係聰明嘅動物咁話。而梁君彥平時嚴肅，但噚日戴起粉紅色嘅河馬呔亦好搞笑。


至於鄉議局主席劉皇發就笑言，佢條斜間呔同梁振英今日戴嘅好似，話係配合對方，故十分同意佢嘅發言，但就對梁振英發言提到獅子山、八仙嶺等時，竟然完全唔提佢主場嘅屯門青山，就有啲失望喇。