澳博選豹女郎得紙板

【明報專訊】澳博作為澳門賭界「大哥大」，一直都係濠江盛事格蘭披治大賽車的贊助商，呢啲咁刺激的活動，一定會有靚女點綴吓，澳博舊年起就搞新花臣，賽車之餘搞埋「豹女郎」選舉，而且仲係由直選產生，畀澳博旗下3個賭場啲客仔投票，非常咁透明同民主。


佢哋噚日為呢個「豹女郎」選舉搞咗個記者會，小琴老友記一聽到有靚女，第一時間飛撲過大海捧場，點知……聽澳博行政總裁蘇樹輝講，呢班專誠由廣州透過模特兒公司選出嘅9位豹女郎，只會喺格蘭披治大賽車期間，即係下個月中至會喺澳門出現，到時除咗喺賽車場之外，仲有機會喺澳博啲場見到佢哋嘅芳蹤。


噚日特登過大海嘅小琴老友，只係見到紙板豹女郎，同埋睇電視的宣傳片。在場最索嘅，就係澳博執行董事、四太梁安琪，佢一雙美腿相信係佢跳舞日子有功練番來，加上保養得宜，比起紙板豹女郎毫不輸蝕㗎。