工展會增儲行李服務

【明報專訊】一年一度嘅工展會喺12月15日至下年1月7日舉行，地點一如以往都係維園，近年愈來愈多遊客去工展會掃平貨，人流極暢旺，今年廠商會就諗住更方便入場者，喺場內提供行李寄存服務，等大家可以盡情血拼。


負責搞工展會嘅廠商會，副會長吳永嘉話新服務希望可以更方便遊客，例如遊客一到香港，酒店都未去就想行工展會掃貨，又或者臨離開香港前都想行番轉，如果拎住行李、拉住篋周圍行就無咁方便，今年加設嘅行李寄存相信可以滿足到遊客，至於具體收費就尚未落實。


工展會近年已經衝出香港，吳永嘉話，早前喺武漢搞完後，明年大約5月會去到廈門搞，吸引內地人去掃貨，同時又推廣一下香港嘅廠商同品牌。