沈祖堯揸住教堂又贏like

【明報專訊】中文大學校長沈祖堯繼「O嘴」模仿名畫《吶喊》影相好多人like之後，最近又有力作。話說沈校長近排去俄羅斯莫斯科旅行，去到當地名勝聖巴索大教堂（Saint Basil's Cathedral），佢專登校準角度留影，伸出妙手「吊起」成座教堂。校長一舉手，雖然暴露圓潤咗少少嘅身形，但出動埋招牌親民笑容，又再次輕易迷倒唔少祖堯粉絲嘞。


Emily見中大社會科學院副教授沈旭暉噚日喺社交網站轉貼沈校長幅玉照，短短5個鐘已經吸引1.1萬人like！有網民留言大讚沈校長可愛，有人就話對住中大新任校董「有排沈校長捱」，因為立法會近日委派咗民建聯葛珮帆、新民主同盟范國威同埋自由黨張宇人做校董，校友叫佢一定要撐住中大咁話。Emily亦都十分欣賞沈校長嘅創意，兼且開始期待佢下一力作。