葉劉林鄭溫馨撐枱腳

【明報專訊】新民黨主席葉劉淑儀過去幾個月不時批評政務司長林鄭月娥，大半年前林鄭仲係局長時，葉太公開講過，喺政務官場，佢係林鄭嘅大師姐，如果入番政府做問責官員，「你叫我返去跟個妹妹？我真係臉皮放唔落囉」，當時仲引起哄動。前一排，葉太又再不點名揶揄林鄭為推國教科落淚一事。外人睇嚟，呢對「姊妹」關係似乎唔多好。


不過，世事無絕對，葉太近日獲委任入行會，心情大好，噚日中午仲去咗政務司長官邸，同「妹妹」林鄭撐枱腳，唔知係咪破冰飯局呢？葉太就話，呢餐飯約咗好耐，無乜特別，只係敘吓舊喎。


林鄭作東 食一粒鐘

葉太似乎食呢餐飯食得好開心，因為佢噚日將兩人合照放上facebook，一齊坐喺梳化飲茶，之後再食撐枱腳午飯。佢話係林鄭邀請佢食飯，雖然餸菜係家常便飯，但「大家共同度過溫馨的一小時」。睇佢哋個飯局，有蒸魚同咕嚕肉，有人就話兩個人起筷影張相都幾chok吓。


呢邊撐枱腳，嗰邊係行政會議非官守成員分批宴請立法會議員，或者係為打好行政、立法關係踏出第一步。噚日行會成員喺金鐘一酒家開兩圍，請咗民主黨涂謹申、公民黨梁家傑、新民主同盟范國威、民建聯葉國謙等人食飯。


據講，席上大家只係閒話家常，阿涂就特別關心行會成員史美倫以前喺中國證監會工作係點，包括係咪要適應內地文化？史美倫同阿涂講，其實內地搵佢去做事，正正就係想佢帶入非內地工作嘅文化，所以喺證監會工作，同喺香港無乜大分別。家行會成員為咗加強溝通，據聞非官守成員每個星期一都會坐埋食飯交流。