余鵬春廖長江係鄉里

【明報專訊】政壇有好多兄弟班，除咗較出名嘅田氏兄弟，仲有廖氏兄弟：新任立會議員廖長江，佢哥哥廖長城係行會成員，兩個分別係人代同政協，喺政壇有好大影響力。噚晚，另一對兄弟、政協常委余國春同細佬余鵬春，用同鄉名義恭賀廖氏兄弟分任行政、立法兩會議員。


原來，廖余兩對兄弟都係梅州人，所以廖氏兄弟做行政、立法兩會議員，都係梅州之光。身為梅州聯會會長嘅余鵬春，噚晚擺咗幾圍賀佢哋，可惜廖長城患重感冒未能出席。


過去大家聽得多政商界多福建幫、潮州幫，余鵬春話，其實梅州都出過唔少名人，除咗佢哋兩對兄弟，仲有前人大常委曾憲梓、維他奶老闆羅友禮等。