《選擇》講強積金賣斷市

【明報專訊】今期消委會嘅《選擇》月刊踢爆近半強積金蝕本，即時成為全城熱話，唔少打工仔爭住買，原本每期印約3萬本嘅《選擇》話咁快就被搶購一空，好似當年嘅安全套測試嗰期咁，喺市面一本難求。咁就好明顯反映打工仔對強積金有幾咁痛恨。消委會已經趕緊加印，希望今個月內可再應市。


蠶食打工仔血汗錢嘅強積金下個星期就實施半自由行，打工仔有「自由」，但係就未必知點選擇，因為市場無比較平台，難怪《選擇》一出手做比較，即刻成為搶手貨。


其實早幾年豬肉賣得貴，都搞到政府日日要報豬肉價，等個市場透明啲，偏偏強迫人哋供款嘅強積金，就無格價平台，點解積金局唔做啲嘢呢？Emily真係覺得好費解。


測安全套亦曾斷市

消委會已趕緊加印《選擇》，等打工仔知所選擇，但係仲要夾吓印刷商，暫時未確定到加印數量，總之就希望喺11月1日或之前可以再推售。


《選擇》賣斷市確係威水，查實已經唔係第一次，早喺1978年，消委會第一次做冷氣機測試都試過賣斷市，1988年做安全套測試亦要加印，結果賣咗7.3萬本，而近年賣斷市嘅紀錄，就係2005年嘅廁紙含菌測試。


今期《選擇》除咗賣斷市，仲包咗個膠袋，事關隨書附送強積金大表一個，為免甩漏要包個袋，而唔係好似當年PAAG嗰期咁，有乳房相至要包膠袋。