立會宴特首 泛民或出席

【明報專訊】特首梁振英上次喺政府總部宴請新任立法會議員，被泛民請食閉門羹，最終只有三丁友赴會。立法會將會按傳統喺下月9日宴請番梁振英，有泛民議員就話今次係立法會主場，應該會出席喎。


公民黨梁家傑話，過去都有出席立法會一年兩次嘅午宴，但未必會全部黨員去晒，直言「唔通個個都咁得閒咩」。民主黨劉慧卿早前話，該黨只希望同政府坐低傾政策，「風花雪月可免則免」，唔知佢哋今次又會唔會去？


不過，Emily聽聞梁振英對民主黨嘅講法都幾有意見，認為食飯都係工作之一，一樣可以傾到公事，仲話如果食飯只係風花雪月嘅話，點解每個月都要向立法會議員發放酬酢津貼喎。