海洋公園出環保海鮮餐

【明報專訊】大家去海洋公園玩，有無試埋佢哋嘅海鮮？9月開始，公園要求自己經營嘅6間餐廳同1間餅店，只可以選購「環保海鮮」，即係由捕撈、養殖，到運輸、儲存都唔可以破壞生態。公園會按照世界自然基金會同海洋管理委員會嘅認證，審批海鮮供應商係咪夠環保，例如用拖網捉番嚟嘅海鮮，就肯定全部免問喇。


拖網海鮮免問 成本增唔加價

原來養蝦、九肚魚呢啲令港人食過番尋味嘅海鮮，都係用拖網捉番嚟，海洋公園一定唔會賣。所以，大家去到公園，唔使旨意會食到有蝦嘅揚州炒飯喇！


採購限制多，海鮮嘅種類自然少，於是廚師更加要花心思。Emily試過呢啲環保海鮮，一樣鮮味十足，一啲都唔輸蝕！海洋公園話，環保海鮮嘅採購成本，由以前佔售價嘅35%增加到40至45%，但餐廳都唔準備加價，希望遊客喺公園醫肚時，學識點樣先叫「食得環保」。


另外，萬聖節就快到，海洋公園一班動物都有份過節。公園職員用假南瓜幫大熊貓炮製「哈囉喂大餐」；又用南瓜籃裝起八爪魚嘅美食，等佢自己搵食；仲幫樹獺嘅大樹屋企裝飾一番，唔單止遊客可以感受萬聖節驚嚇氣氛，連珍禽異獸都可以齊齊「哈囉喂」！