港大搞精神病患畫展

【明報專訊】社會普遍對精神病了解唔深，以為只可以靠藥物同心理輔導治療，但其實藝術治療（art therapy）亦係一種方法。港大行為健康教研中心暑假時，同東華三院樂康軒嘅精神病患者做咗10堂藝術治療，鼓勵佢哋畫出心中所想。港大最近喺多個商場巡迴舉行「畫出心聲」畫展，展出當中20幅作品，希望建立交流平台，等大眾有機會了解精神病患者嘅內心世界。


參與藝術治療嘅陳樂坤話，佢過去幾年因為婚姻同工作問題患上抑鬱症，成日覺得好灰，今次佢畫咗一隻鳳凰，寓意要衝出枷鎖。


畫展今日起至月尾喺紅磡置富都會展出，11月19日至25日就喺香港演藝學院舉行。港大行為健康教研中心第二波會舉辦多場3小時嘅藝術治療工作坊，大家可以試吓喺專業藝術治療師帶領下創作，費用全免，可致電2831 5202查詢。