衛奕信返港大唔講「港獨」

【明報專訊】前港督衛奕信噚日出席港大活動，77歲嘅佢精神依然飽滿。近期唔少網民帶港英旗示威，緬懷殖民地日子，港獨爭論更被炒到㷫烚烚，Emily當然有問衛奕信有咩睇法。衛奕信話，作為前港督，佢唔適合評論政治。咁佢覺得香港有咩變呢？佢話，香港係個充滿動感嘅地方，一直都變緊，但就唔好講係變好定變壞，因為唔同人有唔同睇法。


衛奕信今次係以蘇格蘭阿伯丁大學校監身分，向港大贈送一款專為港大設計嘅蘇格蘭方格花紋（Tartan），標誌雙方合作可以一直延續。衛奕信其實算係港大校友，1960年代喺港大學中文同普通話，做港督時亦係港大校監。佢話今次返嚟港大，令佢諗番起當年喺讀書嘅日子。


幫阿伯丁大學送方格花紋

衛奕信話，阿伯丁大學同港大淵源甚深，125年前創立香港西醫書院（港大前身）嘅白文信爵士，同埋其他4名創校要員，正正係阿伯丁大學嘅畢業生。佢仲講笑話，阿伯丁大學變咗中國歷史，因為，如果無阿伯丁大學，就無香港西醫書院同港大，孫中山亦唔可以喺香港西醫書院畢業，咁就無辛亥革命，引到嘉賓哄堂大笑。


另外，衛奕信1987年接替猝死嘅尤德爵士出任港督，英國傳媒早前報道，話英國嗰時曾經諗過由王儲查理斯接任，衛奕信噚日話唔知呢件事，但佢形容出任港督，係佢人生中最有價值、最有趣嘅工作。