傳結新歡 王石﹕冇背叛家庭

【明報專訊】噚日香港嘅地產股畀額外印花稅炸到散晒，另一邊內房股焦點就落響一則傳聞之上。噚日有網友響微博度爆料，話響飛機見到內房龍頭萬科老總王石同個女仔好鬼親密，個女仔仲枕住王石膊頭瞓覺。呢位網友同時上傳咗張相，影到王石真係同個女仔一齊坐飛機。


消息傳開之後，內地真係一片哄動，仲有人話王石已經同跟咗佢廿年嘅老婆離婚，新歡係一個叫田樸珺嘅女演員。


萬科方面就話呢啲係高層私事，唔方便講太多。


萬科﹕高層私事 唔方便講

但係婚外情傳得沸沸騰騰，就算係私事，王石都唯有回應幾句，之不過佢冇直接承認或否認係咪已經另結新歡，只係話自己冇背叛家庭，仲強調個人感情係非常個人化嘅事，西方叫Privacy，即係暗示大家咪再過問。


女方曾表示最欣賞王石

至於疑似新歡嘅嗰位田樸珺，如果大家有睇內地套電視劇《甄嬛傳》，可能會認到佢就響戲入面飾演敦親王福晉，不過除咗做戲，原來田樸珺都曾經響一間上市公司主管爛尾樓收購，佢仲曾經響幾年前講過最欣賞嘅商界精英就係王石，話佢係「男人中的男人」