樹根搵兩個人幫手管fb

【明報專訊】早前已印錯過卡片嘅民建聯鍾樹根，喺facebook再誤寫自己喺「『主』法會」同「澳門立法會」做議員後，迅即被網民選為「每周之星」，有人仲嘲諷佢做「Tree根」、「Dr TreeGun」。面對外界嘅冷嘲熱諷，鍾樹根噚日就好豁達咁講，多謝網民嘅關心，而佢經黨友提醒同汲取經驗後，已決定搵多兩個同事負責幫佢管理fb，以免再鬧出笑話喎。


「主法會」早寫錯無人發現

Christopher鍾解釋，佢其實好耐之前已打咗自己喺「主法會」工作，只不過無被人發現，後來佢想改番做「立法會」，fb又唔知點解自動幫佢連結咗去澳門立法會。佢大讚班網民好眼利，事關佢改唔夠5分鐘就被人撮咗圖，「大佬呀！我都係試緊改咋，下次改資料時都係唔公開住喇」。


至於網友幫佢改嘅「Tree根」花名，樹根話呢個只係二次創作，無傷大雅，仲多謝網民對佢嘅關心，認為對提升自己都有好處。樹根咁講，即刻令人諗起佢嘅立選口號——「係時候升級！」