CY童軍look 諗起40年前

【明報專訊】根據傳統，回歸前嘅港督以至回歸後嘅特首，都係香港童軍總領袖。噚日喺大球場舉行嘅2012香港童軍大會操，首度出任總領袖嘅特首梁振英（CY）擔任主禮嘉賓，佢仲著埋成套童軍制服，戴住綠色嘅帽，又跟其他童軍一齊宣誓正式成為童軍一員。CY呢個造型一出，認真搶晒鏡啦！不過好看與否，唔少人有不同意見，有人覺得佢件外套好似太大，又有人覺得唔著外套可能好睇啲。


Emily諗起，特首做童軍呢個造型過去好似好少見，諗番轉頭先至醒起，曾蔭權在任期間雖然都貴為總領袖，但就未有試過full gear咁著住童軍制服出席呢項活動，所以大家自然對CY嘅童軍look覺得好新鮮。


童軍玩人浪歡迎

著住童軍衫嘅CY致辭時先講感受，佢話自己自從約40年前最後一次著中學校服之後，就無再著過制服，噚日係咁多年來第一次重新著上制服。之後CY與過萬名童軍一齊宣誓，宣誓後佢話自己對正式成為童軍一員覺得好榮幸。


做得總領袖，CY向過千個優秀童軍頒獎，有過百個要逐個逐個頒，難怪活動期間CY走向大合照童軍人群時，有童軍玩人浪歡迎佢啦。