周四藝術農墟展現觀塘風采

【明報專訊】「星期四玩轉駿業街之綠生活｜藝術」，係政府「起動九龍東」嘅頭炮活動，直至明年1月，逢周四嘅中午12點至晚上7點，觀塘駿業街遊樂場就會變身成藝術農墟，除咗有音樂表演同藝術展覽，場內亦有賣本地有機農產品同手工藝品嘅攤位，部分仲展現昔日觀塘面貌，將藝術農墟打造成有地區特色嘅公共空間。


有嘢買有嘢睇

政府要「起動」九龍東，觀塘呢個舊區梗係唔少得，政府新聞處亦拍短片介紹呢個活動，其中要展現觀塘工業區特色嘅攤位，負責人就利用喺觀塘街頭執返嚟嘅卡板，裝成好似七巧板嘅木枱，又用塑膠西瓜波同卡板，整咗放大版嘅扭蛋機木櫃，帶出觀塘工業區以前「盛產」塑膠呢個意思。


農墟入面亦展出本地藝術家嘅作品，喺區內生活嘅設計師謝曉瑜，就用菲林相機影出嚟嘅相展示區內人情，咁多年嚟設計師影咗超過1000張相，坦言對已飛逝嘅畫面十分感慨。