馬蹄露護龍尾火滾

【明報專訊】環保團體繼續發聲反對大埔龍尾興建人工沙灘，噚日仲喺政府總部搞咗場「守護龍尾大集會」，環團、立法會議員、大專學生代表輪流上台發言，其間無綫女藝員馬蹄露亦被安排上台，講吓佢反對興建泳灘嘅理由。


知道起沙灘即放棄買樓

馬蹄露話，約10年前去龍尾一帶睇樓，覺得嗰度嘅海景好靚，點知地產經紀同佢講第日龍尾會起個人工沙灘，佢就覺得好離譜，做乜好地地會喺個泥灘上面鋪沙，結果決定唔買嗰度嘅樓。


政府話起沙灘前會幫啲生物遷去附近汀角，馬蹄露就話人搬屋都會亂，幫動物搬屋，係咪傻㗎，擔心搬遷生物反而會害死佢哋。佢仲嬲到引用立法會議員「長毛」梁國雄日前招呼梁振英嘅「你鹵味唔食食叉燒」嚟形容佢嘅心情，認為政府唔撤回工程，環團就會爭取到底。