中大生為珠姐「和聲」

【明報專訊】人稱珠姐、身兼港區人大代表嘅基本法委員會委員譚惠珠，近日頻頻公開發言，言論惹火，一時「提醒」港人舉港英旗嘅自由係由《基本法》而非英國人賦予，一時又為特區政府抱不平，話政府孤掌難鳴全因缺乏社會「和聲」，呼籲明年初新選出嘅人代同政協，要更積極為政府發聲。


現身廉署 稱探朋友

有網友見珠姐咁鍾意叫人「和聲」，於是就喺網上製圖，將去年中文大學和聲書院一群學生製作嘅「和聲Beat」合併，令珠姐得到「和聲」，希望好想要人和聲嘅佢「開心吓」。


珠姐噚日未見有公開活動，反而Emily噚日上晝喺北角見到珠姐進入廉署總部，心諗唔通佢要協助調查乜嘢案件，就主動上前問佢。珠姐話，佢係去廉署「探朋友」，至於佢朋友係邊個就無進一步講。Emily翻查廉署委員會資料，就未見佢有份。