馮檢基呻唔夠資源

【明報專訊】從九龍西議員「升呢」做超級議員嘅民協馮檢基，本來應該係好開心咁計劃點樣發圍，但佢就大呻話唔夠資源，搞到做到「爆晒廠」咁話。佢舉例話，過去做九西議員時，喺區內獲發150個街板，但家政府只當佢係一個普通功能界別議員，18區每區只畀佢9個板位，雖然總數目係多咗，但由於佢嘅選民人數由40萬急升至320萬，其實唔夠用。


難開多個辦事處 職員踢晒腳

阿基又話，當選後，佢收嘅地區個案急升，除咗繼續有九西街坊向佢求助，連遠至坪洲、馬灣都有，但佢仲未有足夠資源開多個辦事處，令佢嘅職員做到踢晒腳。阿基建議政府向超級議員增撥資源，至少都加番啲實報實銷津貼。


講番民協，佢哋下周初開集思會，檢討今次選舉同埋以後嘅路向，但就冇諗過同其他政黨合併。負責搞社企嘅民社服務中心，轄下蝕足幾年嘅咖啡店「刻咖啡」終於見到曙光，開始可以自負盈虧，有興趣嘅朋友，不妨去紅磡廣場支持吓。