中策組同CYBBQ 或跳江南style

【明報專訊】前特首曾蔭權過去好鍾意喺粉嶺嘅特首別墅宴客，建制派立法會議員、民建聯中常委等都有去過；特首梁振英（CY）上任至今都好忙，但佢亦趁住天氣轉涼，約咗中央政策組非全職顧問喺嚟緊嘅星期六晚去粉嶺別墅燒嘢食，唔知係咪CY首次用呢間別墅呢？

中央政策組非全職顧問、民建聯嘅季霆剛話，今次係梁振英上任後第一次同佢哋聚會，預計CY都會趁住呢個聚會，諮詢吓佢哋對《施政報告》嘅意見，佢就諗住向特首提出有關青年政策嘅意見，又會講吓中港議題。


中策組入面都有好多年輕人，相信都好鍾意玩，季霆剛仲話想同特首搞搞新玩意，興起時邀請對方一齊跳江南style喎。CY上任後試過好幾次大展歌喉，唱成點大家有目共睹，唔知佢跳舞又得唔得呢？