張炳良有得睇冇得食

【明報專訊】運輸及房屋局長張炳良噚日帶領立法會房屋事務委員會議員「跳出添馬艦」，首次喺中環鏞記設宴，同大家輕鬆交流房屋政策。不過，作為主人家嘅張炳良，就無福消受鏞記燒鵝，佢舉高自己隻包住繃帶嘅手，話自己要戒口，冇得食。原來佢上個禮拜去元朗中轉屋探訪時，上落樓梯時唔小心仆倒，好彩只喺擦傷隻手，無乜大礙。


整親手須戒口

去得鏞記開餐，當然要食馳名嘅燒鵝，外界近年成日批評鏞記喺爭產案後食物質素急劇下降，工聯會王國興就認為，鏞記算係保持到一貫質素，但民協馮檢基就話，雖然鏞記燒鵝仍然正，但鵝皮的確係薄咗又韌咗，令人有啲失望咁話。


阿基又自爆自己係「鵝癡」，2003年SARS時依然堅持食鵝，更特登去鏞記「以鵝代飯」，話自己絕對有豐富嘅食鵝心得。鏞記嘅清盤官司落幕無耐，據聞掌舵人二少甘琨禮到場同一眾高官議員打招呼