Android新版fb中文變簡體

【明報專訊】Android智能手機用家，應該對facebook嘅app又愛又恨，因為有唔少bugs。每次fb提供更新版本，Emily都期望會有改善，但最後仍然有唔少瑕疵。日前fb推出新版本2.0，唔少人更新後大讚快咗同穩定咗，但亦有人發現，若果部電話選擇咗中文（香港）為設定語言，fb介面嘅文字會變咗簡體，唔少人留言要求改番繁體字，有人仲嬲到移除咗呢個app。


杜汶澤fb鬧爆

其中一個不滿呢個安排嘅用家係藝人杜汶澤，佢噚日喺fb大罵，高呼「畀番繁體字我呀」。後來佢提供一個方法，就係將手機嘅設定語言轉為中文（台灣），app顯示嘅文字就變番繁體字。有科技網就話，由於效能欠佳，fb決定重新編寫android版本嘅fb程式，整體有所提升，但係用更改所在地呢招去將文字變番繁體，可能影響其他程式使用，希望fb盡快更新喇。