財爺嘆港傳媒少報喜

【明報專訊】財爺曾俊華乃習武之人，佢噚日喺網誌以〈香港人，怕什麼？〉為題，大談上個禮拜香港誕生咗首個全職「拳王」、年僅25歲嘅曹星如，好值得開心，但翌日睇報紙，各報「只有寥寥一二百字」，令佢有啲失望。財爺又話中文大學醫學院化學病理學系趙慧君教授獲頒「中國青年女科學家獎」都係喜訊，不過佢就比較香港同新加坡，指換轉係星洲傳媒，呢啲威水史就會報得好大，但香港就比較冷淡處理，似係揶揄香港傳媒愛報憂不報喜。


指新加坡相反

財爺以曹星如同趙慧君兩事比較雙城：「每當有關本土的好消息傳出，新加坡媒體幾乎是一面倒鋪天蓋地的報喜，香港媒體對這類新聞則比較冷淡；相反，出現了壞消息，兩地傳媒的取態又會逆轉。」Emily作為傳媒一分子，見到香港有喜事都會高興，但報喜報憂都係傳媒責任；至於新加坡嘅言論自由度有幾高，財爺應該好清楚，Emily就唔評論了。不過財爺咁講，唔知係咪好羨慕新加坡官員呢？


講番曹星如，財爺話上周一直睇住電視，見證曹擊敗吉爾吉斯好手贏咗「亞洲洲際金腰帶」。曹星如賽後話最痛嘅唔係面上傷痕，而係出拳嘅左手。財爺話佢最了解曹嘅痛楚，因為當年喺美國參加武術賽，都因為出力太猛，打斷咗右手手掌骨，做接駁手術後骨都變咗形，所以家握拳時，無名指接連手掌嘅關節處，仲有一個清楚陷入去嘅凹痕！


財爺之前講過，佢後生時喺美國波士頓跟鄺鐵夫學洪拳，而黃飛鴻都算係佢師公。