何喜華：CY僭建唔出奇

【明報專訊】社區組織協會噚日喺香港文化中心舉行講述劏房問題嘅攝影展，邀請咗梁振英（CY）出席。眾所周知，社協主任何喜華係忠實「梁粉」，早喺特首選戰期間已經表明支持CY，但係CY至今上任半年，僭建醜聞纏身，誠信受到質疑。不過，何喜華對CY仍然不離不棄，佢話施政同僭建係兩回事，又話對於CY大宅有僭建，唔覺得出奇，好多豪宅都有僭建，但佢都忍唔住話希望CY全面啲交代僭建事件。


「施政僭建兩回事」

何喜華又同意家政府施政時承受壓力，希望政黨唔好畀太大壓力政府，但佢話如果政策獲市民支持，相信政黨都唔會故意留難。


咁何喜華滿唔滿意CY呢半年嘅表現呢？佢話覺得CY已經好積極做事，例如成立長遠房屋策略督導委員會同埋扶貧委員會，但知道貧窮同房屋問題唔係一時三刻解決到。佢仲話，比起之前兩任特首，覺得CY喺扶貧同解決房屋問題方面都更加積極，仲不忘講多句﹕「曾蔭權更加唔使講啦！」似乎何喜華對曾蔭權嘅表現真係唔多滿意喎！


社協嘅展覽，展期會去到23日。