經民聯唐營舊部雲集

【明報專訊】手握議會7票嘅經濟民生聯盟噚日舉行成立典禮，特首梁振英、財政司長曾俊華、律政司長袁國強到場之外，多個局長同常任秘書長都有現身。雖然有唔少「梁粉」到場，但在場所見，經民聯似唐營翻生多過係「香港營」，唐唐雖無現身，但佢嘅堅實支持者、麗新集團主席林建岳擔任經民聯監事會主席，特首選舉時力撐唐唐嘅全國政協李大壯任副主席；曾任唐唐競選辦秘書長嘅前高官何鑄明就係經民聯執委。


林建岳任監事會主席唔反梁

林建岳話，佢加入經民聯，係代表成個工商、專業界嘅支持，話係誠心為香港好，為中小企吶喊，同為中產謀幸福咁話。佢仲話，自己「從政」，唔係見到政府咁差迫住出手，而係凡事都有第一次，希望為香港發聲，仲表明經民聯唔係「反梁」，又話好支持特區政府，批評啲人倒梁其實係「倒米」。


經民聯嘅顧問團都算星光熠熠，好似前局長馬時亨，廠商會會長施榮懷，前會長黃友嘉，政協常委陳永棋、醫管局主席胡定旭等。咁唐唐呢？主席梁君彥就話，唐唐啱啱外遊返港，佢哋亦無請唐唐做顧問，副主席林健鋒就話，唐唐都有致電恭賀。


無請唐唐做顧問

唔少政商界猛人都有畀面出席，長實副主席李澤鉅笑住現身，仲有匯豐銀行亞太區行政總裁王冬勝、合和主席胡應湘、會德豐副主席梁志堅等等。唔少人代候選人亦有出現，相信佢哋祝賀人之餘亦盡最後努力拉票，事關今日就係投票日喇。另外，數碼廣播電台（DBC）股東黃楚標噚日亦有現身酒會，對DBC被罰停牌30日，佢話股東將喺月內開會，商討解決方案喎。