余若薇懷念黃仁龍

【明報專訊】公民黨兩位女將余若薇與陳淑莊，唔做議員後分別都有好多專欄要寫，最近佢哋喺議會外又合作，一齊喺Yahoo! 寫專欄，噚日上載首篇由余若薇執筆，佢話律政司長袁國強近日嘅舉動，令佢好懷念前司長，即係佢同門師弟黃仁龍。


「你發現一處 我修正一處」

余小姐篇文名為「法治也僭建」，佢形容袁國強「請求」終審法院審理外傭居港權案時，「搭單」處理雙非嬰居港權問題，由法院提請人大常委會釋法，推翻法院13年前對雙非嬰莊豐源一案嘅判決。袁國強呢個舉動係尊重法院，訴訟一方可以提出論點，最後由法院定奪，但余大狀話咁就好比特首梁振英偷雞僭建，然後將責任推畀屋宇署，「你發現一處，我就修正一處」，然後仲話自己「開誠布公」，真係愧為專業測量師。


話仁龍無不擇手段

余小姐話律政司唔係政府法律打手，必須捍衛法治，佢話家社會承受唔到雙非問題，解決辦法應該係修改《基本法》，而唔係叫法官重新判一次。佢話呢件事令佢好懷念前任律政司長黃仁龍，喺雙非孕婦湧港高峰期，都無不擇手段咁要求法院解決入境政策嘅問題，可惜繼任人唔識「君子有所為有所不為」嘅道理，只係緊隨中共總書記習近平嘅說法，走向三權合作。