韓流帶旺 亞博加人工

【明報專訊】韓流風靡各地，連大嶼山亞洲博覽館都要借助韓風搞旺個場，佢哋家陣個個月都有韓星出show，今年售出嘅韓星演唱會門票有成10萬張咁多，比舊年多咗13倍，所以今年業績好好，同事當然有人工加，亞博行政總裁哈永安就唔肯講加幾多，總之就多過2％喇。


今年亞博嘅出租面積有2000萬平方呎，連續第二年錄得兩成升幅，亞博話，佢哋無計到出租率，淨係話有70萬呎可供出租，今年超過210日有活動。


亞博創佳績，韓星功不可沒，但都要多謝大陸自由行，哈永安估計，家有四成客係內地客，每當佢哋有活動，大嶼山嘅酒店都會迫到爆，為今之計，就係希望新界西盡快起多啲三四星酒店，如果唔係，就會畀酒店樽頸影響發展咁話。