CY撐劉華﹕He is the best

【明報專訊】獲委任做政制及內地事務局副局長嘅民建聯前副主席劉江華噚日返新工，即日已有人抗議踩場，網民繼續發揮創意惡搞。劉華做副局呢件事，要勞動喺北京述職嘅特首梁振英解畫，佢話政府係用人唯才，相信劉華能夠同局長譚志源好好合作。當有記者用英文發問，梁振英答，話劉華「Well, he is the best person」。


自政府公布消息後，網民已將劉華競選期間嘅「香港要贏」橫額改做「輸會變贏」，仲幫佢列出贏嘅秘訣就係香港人愈憎愈好前途。政制及內地事務局前局長林瑞麟有林公公外號，估唔到劉華亦好快升呢，被網民捧做劇集《大太監》主角，做梁振英太后身邊嘅李連英。


雖然被網民咁玩法，但一向EQ高嘅劉華噚日朝早到政府總部返工時，仍難掩絲絲笑意。畀政府力讚從政經驗豐富，劉華好謙虛咁話，加入政府係新經驗、新挑戰，嚟緊會同立法會各黨派同社會各界多溝通，協助局長推動政改、處理內地事務同人權等問題。


立法會落敗，但政府仍邀請落敗嘅劉華加入，係咪唔理民意？劉華就話會尊重唔同意見，努力做好本分，又話唔會低估一切困難同挑戰喎。至於《基本法》23條會點？佢就圓滑咁話，噚日第一日返工，唔適合評論。