亞視訪問完唔播 毛姨姨疑惑

【明報專訊】立法會議員中，公民黨毛孟靜批評人時又辣又狠，試過當面罵亞視股東王征「傻」，早前仲喺立法會提出要求政府發免費電視牌照嘅動議，成班議員亦藉機大罵亞視。毛孟靜同Emily講，鬧完王征後，亞視節目《時事追擊》仲搵佢做訪問大談寵物問題，當時喺佢屋企做足兩個鐘，但節目前晚播出，當中就無咗毛姨姨嘅訪問喇，事後亞視中人打畀佢，話訪問無咗佢嘅原因係「高層嘅決定」，因認為「唔適合」喎。


毛姨姨話，上個月底接受訪問都係抱住測試心態，皆因訪問之日已經發生咗佢鬧王征「傻」一事，而訪問就搵佢講寵物私人繁殖不可取等具體問題，佢覺得人哋搵得佢做訪問，相信亞視高層都會知道啦，估唔到最終就係唔播佢嘅受訪內容。


亞視中人話「高層決定」

毛姨姨話其實佢自己都無睇番呢個節目，不過亞視中人好心打畀佢講唔好意思，佢當然問對方點解無出啦，結果就得到「高層決定」等答案喇。Emily問過亞視唔播毛姨姨訪問係咪有政治審查等原因，但截稿之前都未得到回覆。