南極企鵝第一年過香港聖誕

【明報專訊】今日聖誕節，Emily先代表《明報》同大家講聲聖誕快樂、假期愉快！海洋公園嘅可愛動物亦唔執輸，趁聖誕亮相祝福大小朋友，而公園都好識做，特登為佢哋送上聖誕禮物。


今年先搬入海洋公園無幾耐嘅南極企鵝，係第一次喺香港過聖誕㗎，公園就特別製作咗兩座巨型雪人冰雕作為佢哋首份聖誕禮物，為企鵝之家增添唔少氣氛。仲有鸚鵡呀咁都出一分力，向遊人送上祝福。


侏狨生日 收到水果雪人

另一邊廂，園方為全球體型最細嘅猴子侏狨送上一個「水果雪人」，作為佢聖誕兼1歲生日禮物。呢個雪人嘅體積同侏狨一樣咁「大」，由青瓜、橙等蔬菜水果製成，不過呢排天氣咁凍，仲要佢食生冷嘢，唔知侏狨頂唔頂得順呢？