學生扮小丑不再怕人笑

【明報專訊】第二屆香港小丑節噚日頒獎，聖言中學嘅14歲學生莫朗希，同埋16歲嘅王俊喬組合贏咗學生組冠軍，佢哋話做小丑好有成功感，咪睇兩人喺台上默契十足，原來只係練咗兩個禮拜，但因為成日畀同學笑奇怪，唔敢同人講佢哋參賽，諗住贏咗先公布天下。讀緊中五嘅王同學話諗住大個做作家，又做業餘小丑，Emily祝佢理想達到。


至於公開組就由30幾歲嘅文員「小丑 Wing Wing」梁健榮贏得冠軍，佢明年2月會代表香港去馬來西亞參加世界小丑賽。梁健榮已有14年做小丑經驗，讀中三時學校神父教佢拋絲巾，就係咁鍾意咗做小丑，之後仲喺海洋公園同美國小丑學院參加專業訓練。佢話好難有職業好似做小丑咁開心，而且平均每場表演都掙到千幾二千蚊㗎。