漁署領養日要設冷靜期

【明報專訊】漁農自然護理署噚日舉行寵物領養日，市民可以領養貓貓、兔仔同爬蟲類動物。漁護署動物管理科高級獸醫師周嘉慧話今年辦過兩次狗狗領養日，而今次無佢哋份，希望市民明白雖然狗仔係熱門寵物，但其他寵物都面對被人遺棄嘅悲慘遭遇，需要市民關心。


提醒關顧狗狗以外動物

漁護署同13間動物福利機構合作咗好多年，一齊推廣領養信息，動物福利機構噚日就展示咗可以領養嘅寵物，但市民無得即日帶走佢哋㗎，有興趣嘅人要先登記，動物福利機構會喺一個禮拜「冷靜期」後處理申請，以免市民因為一時衝動領養，所以有人帶埋寵物箱嚟但撲咗個空。


現場真係有唔少市民想領養寵物，8歲嘅何小朋友讀緊小三，屋企有兩隻拉布拉多犬，但仲想領養多隻龜或蜥蜴。何媽媽為咗令囝囝明白養寵物係一個有責任、終生嘅決定，要求佢負責照顧屋企兩隻狗仔1個月，通過考驗先可以領養新寵物。


至今年10月，漁護署共接收近9000隻貓狗，但只有唔夠一成被領養。周嘉慧話，領養寵物可以令佢哋重生，但市民決定養寵物前真係要諗真啲，考慮自己嘅經濟能力、時間、對動物嘅認識等。