80年代《警訊》回歸？

【明報專訊】政府家出新聞公布，唔單止係出稿，連警方都有新猷，就係拍埋宣傳短片，喺網上出動真人講解今日元旦遊行嘅封路措施，提醒市民今日港島區有多個大型遊行，維園又有工展會，所以預計會有好多人，要實施封路等人流管制措施。警隊用意雖好，但呢段3分45秒嘅短片，拍攝手法傳統，搵個警官企喺度係咁講講講，真係好似Emily細細個喺80年代睇嘅《警訊》節目。


全程嚴肅讀台詞

港島總區警司楊志文今次粉墨登場，仲拍埋外景，喺維園工展會外講解今日各項遊行活動安排，又有廠景，佢指住維園地圖，提醒遊行人士要採用嘅路線圖，避免同工展會參與者爭路。但係楊sir全程都好嚴肅，企到硬一硬，字正腔圓讀出台詞，呼籲市民如果想去銅鑼灣同天后消閒購物，要盡量使用公共交通工具，以及遵從現場警務人員或活動糾察嘅指示。


陳淑莊聲沙堅持唱歌撐遊行

警方迎合新一代，拍宣傳片同市民講解工作，用意良好，但創意就始終難及民間團體。好似公民黨副主席陳淑莊Tanya，佢都透過網上短片宣傳今日民陣嘅遊行。Tanya把聲近日雖然好沙啞，但堅持獻唱《壞腦孩》二次創作版，放喺《主場新聞》上嘅專欄播放。歌詞包括一句「Why why 撐CY ，為兩嚿禁忌分解」，擺明係諷刺有傳聞話撐CY去遊行者有200蚊報酬，呢啲雖然係無證據嘅傳聞，但用喺歌詞上都幾搞笑。