元旦大遊行 警司下令圍市民

【明報專訊】元旦大遊行引發嘅警民衝突餘波未了，噚日有網民上載一段片，顯示當日示威者到長江中心門外行人路散步時，畀大批警察圍住，搞到示威者同市民被困住，示威者即時起哄，質疑警方有咩理據咁做，話係非法禁錮。其間有示威者用大聲公要求警方指揮官出嚟對話，正當警方無表示而示威者打算散去時，警司朱經緯喝令「唔放得，全部圍住」，令現場人士好不滿。


社民連梁國雄話，雖然事發時佢唔喺長江中心，但認為警方濫權，佢話除非警方實施宵禁，否則完全無理由困住市民，要求警方交代。


長毛指濫權促交代

警方回應話，現時已經拘捕9名市民，涉嫌喺公眾地方擾亂秩序同非法集結，由於事件進入司法程序，現時唔作進一步評論，但就話若果有市民覺得受到警方不合理對待，可向投訴警察課投訴。有關片段，可瀏覽http://www.youtube.com。