田北辰仍然被叫田北俊

【明報專訊】《城市論壇》噚日請咗多個政黨代表出席節目，講吓對下星期三（16日）公布嘅《施政報告》期望，或者自由黨榮譽主席田北俊從政時間長啲、知名度又高，大家對同係立法會議員嘅田北俊細佬、新民黨副主席田北辰未係好熟悉，噚日無論係主持定台下發言者，都講錯田北辰嘅身分。


節目一開始，主持謝志峰當然要介紹吓台上嘉賓，當介紹到田北辰時，佢口快快講錯咗二少做田北俊，搞到田二少都講笑話要叫港台扣謝志峰人工。


喺節目上，田北辰提出要加強公屋流轉，好似如果有公屋戶啲仔女已經長大，搬晒出去住，兩老係咪仲需要住咁大間公屋呢？此話引起「青年拒當樓奴」嘅代表好反對，發言時話「好反對自由黨嘅建議」。坐喺田二少旁嘅自由黨主席周梁淑怡立即搶住叫大家唔好搞錯，話自由黨無講過，澄清田北辰係新民黨唔係自由黨。


雖然田二少係曝光率高嘅新丁議員，但佢都要諗方法等大家認住佢喇。