夢熊：批CY唔係「呷醋」

【明報專訊】全國政協委員劉夢熊前日話特首梁振英（CY）用人唯親後，噚日又有偉論。佢話，佢批評CY，唔係因為佢「呷醋」不獲委以公職，相反，佢聲稱都有獲分餅仔，話CY早於上年5月就問佢對加入邊啲諮詢委員會感興趣，叫佢開張清單出嚟。不過，夢熊話「不必了」，所以係佢自已唔接受公職，唔係CY唔識貨咁話。夢熊又話，無論有無銜頭，佢都會「為民請命」，而公職對佢「有乜吸引力？」


夢熊噚日喺商台節目《在晴朗一天出發》繼續諷CY班子唔夠班，要徹底改組。佢又話，媒體經常指佢係「頭號梁粉」，其實佢係支持CY政綱，強調CY「做得好就支持、做得唔好就批評」，唔會做盲目梁粉。