新聞類別
港聞
詳情#
【明報專訊】特首梁振英（CY）噚日朝早出席行政會議，場外嘅請願區非常熱鬧，十幾名支持CY嘅齊心行動成員專程到場，打算向CY遞交1萬多個支持佢嘅簽名。另一邊廂，幾名青年撐退保聯合陣線嘅成員亦到場抗議，要求政府訂立退休保障制度。雙方碰頭立即擦出火花，一度鬥大聲互相對罵，結果CY話現場太嘈，所以唔答記者問題，講咗幾句就轉身走咗，果然識得把握機會！
愛港力撐梁講到出口
另外，撐梁組織「愛護香港力量」嘅召集人陳淨心，噚日上咗港台《左右紅藍綠》，佢喺節目第一句就開宗明義話﹕「大家好，今日我上嚟係撐特首嘅。」陳淨心話CY上任以來推出咗多項惠民措施，又批評有政客藉僭建事件針對CY。
不過，有網民發現有人噚日咁啱喺愛港力fb群組，呼籲大家去信投訴《左右紅藍綠》前日邀請民陣副召集人韋少力喺節目中自我宣傳，又容許韋少力喺節目教唆犯罪，呼籲市民參與少交10蚊稅嘅公民運動。有網民就質疑，愛護香港力量所講嘅傳媒中立，係咪只准傳媒報佢哋嘅聲音呢？
留言 (0)
