「年紀大淡出」 葉太為食癦拜拜

【明報專訊】如果大家好記性嘅，應該都會有印象新民黨主席葉劉淑儀做高官時，右邊嘴角有粒幾明顯嘅「為食癦」，不過最近葉太呢粒癦就唔見咗，唔通佢都走去脫癦？非也。葉太話佢粒癦無咗，相信係因為年紀大、身上嘅印記慢慢褪色啫。


葉太喺facebook上提到，佢嘴角粒癦出世時已經有，一直係佢嘅標記，就算嘲諷佢嘅漫畫，粒癦都係不可或缺嘅「角色」，但佢近日照鏡，就發現呢粒癦漸漸「淡出」，顏色淡咗之餘又變細，引起啲人問佢係咪走去脫癦，搞到葉太要喺網上澄清無此事。


黨友史泰祖：情况罕見

葉太嘅黨友史泰祖係皮膚科醫生，佢話，通常人大咗，身體上嘅癦或印記應該會增多或者加深，但點解葉太相反，史醫生承認葉太嘅情况都算罕見，雖則大多數嘅癦都會隨年月而加深，但都有例外嘅，可能係葉太自身免疫系統「攻擊」下，令粒癦褪色喎。