劉華深圳開會遲到

【明報專訊】政制及內地事務局副局長劉江華噚日首次以副局長身分參與深港合作工作會議，但個會開咗近10分鐘，Emily都未見到劉華到場，原來劉華遲到！有電視台影到喺會議開始後佢至走入會場，問劉華點解遲到，佢只係話「有啲事」，又話唔係同其他高官一齊坐車嚟，真係耐人尋味。


主辦方放張空櫈等佢

Emily就收到風，話劉華並無遲咗到會場，只係到場後「有啲濕滯」先至遲咗開會，真正原因恐怕只有劉華自己至知喇。本來，噚日會議咁多香港官員列席，遲到都應該唔係好覺眼，弊就弊在主辦方一早幫佢擺咗張櫈，劉華未到，空櫈就好顯眼喇。


噚日工作會議嘅簽約儀式後係新聞發布會，但主辦單位一時擺烏龍，安排記者同政務司長林鄭月娥、深圳市長許勤、政制及內地事務局長譚志源同埋劉華等官員坐埋一齊，Emily同另一名港媒見如此機會，就一支箭按指示坐啦，但內地傳媒就有啲卻步。呢個時候，主辦單位察覺有問題，再請兩名官員離開採訪區，轉坐另一排座位。


Emily覺得呢個安排好好，起碼個位唔會遠到連司長同市長嘅影都睇唔到，仲可以直接問劉華點解遲到