民記辦事處數目睇齊大家樂

【明報專訊】民建聯作為本地第一大黨，辦事處數目唔會少，噚日主席譚耀宗、副主席張國鈞（Horace）就分別有辦事處開幕，雖然地點唔同，但作為政府盟友，局長都畀面出席。Horace西環辦事處開幕，做晒功課先致辭，數吓民建聯有幾巴閉，佢話民建聯支部、議員辦事處數目雖然難及「梗有一間喺左近」嘅7-11，但就同全港「大家樂」嘅數目相若。


兩新辦事處開幕

Emily上網睇過，大家樂喺香港有超過140間分店，民建聯作為一個政黨，可以開到相若數目嘅辦事處，唔單止人多勢眾，仲要財多先做得到，相信其他政黨都望塵莫及，分分鐘成個民主派啲辦事處夾埋，都唔夠民建聯多。


主禮嘉賓個個都讚Horace係最年輕嘅民建聯副主席，政制及內地事務局長譚志源為咗搵相同點，就話佢都係最年輕——係問責團隊中最年輕嘅局長喎，呢個說法似乎有啲牽強喎。


Horace本身係執業律師，除咗區議員亦有唔少公職，仲有個未夠1歲嘅囡囡要湊，周身忙嘅佢原來仲攻讀緊人權法課程，難怪張副主席都呻辦事處租貴之餘，律師嘅收入亦因太忙而減少。